ផ្កាលឿងរាជ ឬរាជព្រឹក្ស

លឿងរាជ

លឿងរាជ ឬរាជព្រឹក្ស (Cassia Fistula) ជាប្រភេទដើមឈើដែលមានកម្ពស់ ១០-២០ ម. ត្រកូល Fabaceae ផ្កាជារំយោលវែង ២០-៤០ ស.ម. ផ្កានីមួយៗ មានសសៃនៅចំ កណ្តាល ៤-៧ ស.ម. មានត្របកពណ៌លឿង ទំហំប៉ុនគ្នា ៥ ត្របក ផ្លែប្រវែង ៣០-៦២ ស.ម. និងទំហំ ១.៥-២.៥ ស.ម.។ ភាគច្រើនគេប្រទះ ឃើញនៅអាស៊ីខាងត្បូង ចាប់ពីភាគខាងត្បូង នៃប្រទេសប៉ាគីស្ថាន រហូតដល់ឥណ្ឌា ភូមា និងស្រីឡាំងកា។         


     ​​  លឿងរាជត្រូវបានគេនិយមដាំតាមសួនច្បារសាធារណៈ ឬតំបន់ដែលមានអាកាសធាតុក្តៅ និង ក្តៅសើម វារីកលូតលាស់បានល្អបំផុតនៅកន្លែងវាលស្រឡះ អាចដាំបានទាំងប្រភេទដីឥដ្ឋលាយ ខ្សាច់ ដីឥដ្ឋ ធន់នឹងអាកាសក្តៅ និងដីប្រៃ ប៉ុន្តែមិនធន់នឹងអាកាសធាតុត្រជាក់ខ្លាំង ព្រោះអាចបង្ក ឱ្យមានការដុះផ្សិត និងរោគស្លឹកប្រហោងៗ។

ការដាំដើមលឿងរាជ

ក្នុងរយៈពេលដាំដំបូង ដើមលឿងរាជ ឬរាជព្រឹក្សអាចរីកលូតលាស់យឺត។ ប៉ុន្តែក្រោយពេលពីដាំបានរយៈពេលពី ១-៣ ឆ្នាំ ដើមលឿងរាជនឹងរីកលូតលាស់លឿន សំបកពណ៌ត្នោតរលោង មានឬសកែវវែង ពណ៌លឿង និងមានឬសខ្នែងច្រើន។ នៅពេលដែលដើមលឿងរាជ ឬរាជព្រឹក្សមានអាយុពី ៤-៥ឆ្នាំ វានឹងចេញផ្កា និងផ្កា។

ការថែទាំ

ពន្លឺៈ ដើមលឿងរាជត្រូវការពន្លឺថ្ងៃខ្លាំង និងកន្លែងដែលស្រឡះ

ទឹកៈ ដើមលឿងរាជត្រូវការទឹកបរិមាណតិច គួរស្រោចទឹក 7-10 ថ្ងៃ/ម្តង អាយុប្រហែលជា 4​ ឆ្នាំអាចធន់នឹងធម្មជាតិបានដោយខ្លួនឯង។

ដីៈ ដើមលឿងរាជរីកលូតលាស់បានល្អជាមួយប្រភេទដីឥដ្ឋលាយខ្សាច់ ដីឥដ្ឋ

ជីៈ ដើម្បីឱ្យដើមលឿងរាជរីកលូតលាស់ល្អ គេនិយមប្រើជីកំប៉ុស 2-3 កីឡូក្រាម/ដើម គួរដាក់ជី 3-4 ដង/ឆ្នាំ

ពូជៈ និយមការណ្តុះគ្រាប់ និងផ្ស៊ាំមែក ប៉ុន្តែវិធីដែលទទួលបានល្អគឺ ការណ្តុះគ្រាប់

រោគៈ ដើមលឿងរាជមិនសូវមានបញ្ហារឿងរោគ ព្រោះវាជាដើមឈើដែលធន់នឹងអាកាសធាតុបានល្អ

សត្រូវៈ ដង្កូវចោះដើមដើមលឿងរាជ ធ្វើឱ្យដើម និងចុងមានប្រហោង ស្នាមចោះធ្វើឱ្យមែកបាក់ ឬងរ

ការការពារៈ គួរដាំដើមលឿងរាជាដោយសំអាតបរិវេណកន្លែងដាំ ឬកំចាក់សត្វល្អិតដោយប្រើ ថ្នាំDimethoate ។

គុណប្រយោជន៍

ដើមលឿងរាជមានគុណប្រយោជន៍ដូចខាងក្រោមនេះ

ផ្លែចាស់ៈ  ផ្លែពណ៌ត្នោតចាស់ មានរសជាតិផ្អែម អាចយកទៅធ្វើ ជាថ្នាំព្យាបាលជំងឺទប់លាមកបាន ដោយផ្លែចាស់មកដាំទឹក និងដាក់ អំបិលបន្តិច ផឹកមុនពេលគេង ឬមុនទទួលទានអាហារ។ ក្រៅពីនេះ ផ្លែដែលចាស់មានសារធាតុដែលមានឥទ្ធិពលដល់ប្រព័ន្ធប្រសាទសត្វ ល្អិត នៅពេលដែលយកផ្លែមកបុកហើយត្រាំទឹកទុកចោលប្រហែលជា 2-3 ថ្ងៃ អាចយកទៅបាញ់កំចាត់សត្វល្អិត និងដង្កូវដែលបំផ្លាញបន្លែ បាន។ លើសពីនេះទៀតគេអាចយកទៅដុតក្នុងការដាំស្ល ហើយសាច់នៅក្នុងផ្លែអាចប្រើ ជំនួសកាក ស្ករក្នុងការធ្វើជាមេ Microorganism ។

ផ្លែខ្ចីៈ បំបាត់ស្លេស

ស្លឹកៈ អាចយកទៅប្រើសម្លាប់មេរោគបាន

ផ្កាៈ ជួយបំបាត់ដំបៅដែលរលួយ